曼城半場大殺迪

2019-04-03 09:08:53 来源:网络

今季遇弱旅輕易爆破
力爭「4冠王」嘅曼城周中快車主場鬥卡迪夫城,現時落後利物浦2分嘅「藍月亮」,今場贏波就可重登榜首,佢哋對弱旅最叻快刀斬亂麻,今季5次對英超榜尾3隊,4次開出半場大,包括首循環作客大炒今晚對手「卡城」5比0,半場已開出3比0;卡迪夫城揚言會出青年軍,有利曼城早早開紀錄,誠意推介中位數1.5球半場大盤。

(Now 621周四凌晨2時45分直播)

卡迪夫城上仗輸車路士1比2極冤枉,繼續排第18位,護級水深火熱。車仔扳平一球明顯有2個球員越位,賽後領隊禾諾克企喺中圈「怒睥」球證宣洩不滿,馬來西亞班主陳志遠更喺當地電台讀出聲明,話完全支持禾諾克嘅做法。禾諾克喺賽後記者會上,威脅今場作客曼城,隨時會用U23算數:「場入面邊個踢緊其實唔緊要,邊個舉旗同吹哨子先係最重要!」

「卡城」宣洩不滿話出青年軍
姑勿論禾諾克係真係假,其實都有利開大。球隊今季聯賽9次面對Big 6全敗,包括首循環主場吞曼城5蛋,但其實佢哋上仗踢得唔曳,如果原班人腳上陣,谷住啖火隨時同曼城死過;若然真係「玩嘢」出青年軍,曼城一眾星級球員,絕對可予取予攜,入波自然唔成問題。

曼城踏入季尾雖要應付英超、英足盃及歐聯3條戰線,不過未見疲態,領隊哥迪奧拿手上大把兵用,如意算盤自然係早早奠定勝局,畀班主力有機會休息。事實上佢哋對弱旅絕對「No Mercy」,今季聯賽5次對榜末3弱卡迪夫城、富咸及哈特斯菲爾德,4次半場總入球2球或以上,相信今晚同樣可以順利開出1.5球嘅半場大。