美斯救世上盤要根

2019-06-23 10:31:37 来源:网络

爭出線要狂數卡塔爾
今晚美洲國家盃B組尾輪生死戰,阿根廷強攻卡塔爾。阿根廷依家只得1分,出線形勢告急,隊長美斯需要挺身而出,今場唔單止非勝不可,仲要力求大炒對手,以防要與其他組別爭最佳第3名,加上佢哋專恰亞洲球隊,有力大勝卡塔爾,就算讓1.5/2球照捧上盤。

(Now 650及Now E周一凌晨3時直播)

阿根廷首輪先吞哥倫比亞兩蛋,上仗又只能逼和巴拉圭1比1,2戰只得1分排緊B組包尾,出線形勢極為危殆,今場必定以大炒對手為目標。隊長美斯之前已試過夥拍阿古路或拿達路馬天尼斯,但效果一般,後者更有傷。有傳主帥史卡朗尼打算變陣433,另一前鋒保羅戴巴拿今仗會擔正,拍住美斯同阿古路攻堅,但無論點變陣,都係要靠美斯單天保至尊,就好似上年世盃分組賽尾輪,賽前同樣只得1分嘅阿根廷,又係憑美斯早早打開紀錄,最終擊敗尼日利亞先殺入16強,今仗碰上呢組實力最弱嘅卡塔爾,又係美斯力挽狂瀾嘅時候。

身為來屆世盃主辦國兼今年亞洲盃盟主,卡塔爾今次以嘉賓身份首戰美洲盃,雖然首輪成功逼和巴拉圭2比2,只因對手輕敵所致,次輪戰至比賽末段以0比1輸畀哥倫比亞,2戰只得1分,今場必須要贏波先有機會晉級,頗為渺茫。翻查紀錄,阿根廷每逢面對亞洲球隊特醒,近3次對亞洲球隊贏晒之餘,全部至少贏4球,今次鬥大賽經驗不足嘅卡塔爾,隨時上演一場大屠殺,讓1.5/2球亦冇有怕,直取上盤。

哥倫比亞留力半場和啱數
同組另一場哥倫比亞對巴拉圭,哥倫比亞頭兩輪贏晒兼冇失波,依家領先次席巴拉圭4分,提早取得首名出線8強,今仗毋須搏命,隨時為淘汰賽留力,睇番佢哋頭兩輪都開半場和,明顯喺初段穩陣行先。況且巴拉圭欠缺強攻本錢,預計會採取穩中求勝策略,兩軍近6次交手,有5次開半場和,值得追多鋪。